 |
 |
 |
 |
 |
Ivo Ruzante
Nato nel 1933, viene abitare alle Cave
all'età di tre anni in Via Malpighi (eà seconda dee quatro stradee). Questi alcuni ricordi della sua straordinaria infanzia:
"E ora: Mi jero sensa popà e co g’ò scumisià ea prima elementare, gavevo i amissi, Idone, Giulio, ciamaà el rosso, perché el jera rosso de cavéji, ma el jera ‘na legenda perché el se meteva ea bareta pà scondare i cavéji rossi, ma tuti i contadini eo conosceva che’l jera jù, parchè el jera l’unico che gaveva ea bareta.
E ora: a scoea 
, g’ò scumisià a fargh'è ea tira ai peri, pomi, patate americane che i tosi meteva sui calti dea stùa a scaldarse e, ‘nando in cesso, gh'è pasavo visin e gh'è i armavo, anche se par magnarli in freta, me brusavo ea boca.
Ea Flora (la Fedora, la mitica bidella dell'Edificio Vecchio: ndr) ea gaveva tre tose, l’ultima, ea Silvana, bea. Cò rivava ea legna, gh'è davimo ‘na man a portare dentro ea legna soto ea scaea e ea ne dava ea manceta.
Te capirè: me mama me compagnava sempre dentro in classe, perché se no, no gh'è ‘ndavo. gh'è jera i amissi e dovevimo ‘ndare pae caserme. Dopo dò ani de prima, i me gà mandà aea Fogasaro. Gh'è jera ea maestra Cavini e anca eà, me mama, me 
compagnava fin dentro in classe. Ma cò ea voltava el cueo ea ciapava el tram pà tornare e mi me jero za tacà da drio. Scoea poco, stavo in giro.
Te capirè: ea Gina ea rivava casa ae oto, oto e mezo, e ora mi me metevo in baraca coe gaine perché savevo che ea me bastonava perché no jero ‘ndà scoea, ea voeva vedare i compiti.
Me fradeo più vecio, Marceo el se ne fregava - ju ze nato nel ’21 e mi nel ’33-, me fradeo Danilo el jera in coejo, sichè, chi comandava in casa, jera ea Gina.
Davanti casa gavevimo do albari de strope e me sorea più vecia, ea Gina, me bateva cò ‘na stropa grossa come un deo. Me mama ghe diseva “Vuto coparlo”. Ea Gina! Ea xe morta tre ani fa. Me mama me bateva coe man, ma me sorea coea vìs-cia. ‘ndavo casa spesso coi oci gonfi, se barufava par qualsiasi motivo. Pugni, peade, de tuto e casa ciapavo el resto.
E ora A caserme, a sete-oto ani. Tanto a sete ani jerimo zà boni a noare, se trovavimo tuti zò nea boscheta dea Brentea e eà fasevimo i trampoini. Eo seto quanti mi-itari xè morti negai. I ‘ndava lavarse e no i jera pratici, e rive ripide, ea corente forte e erbe che te ligava i pie.
E ora: dopo gavevo el campo da aviasion. I me mandava dentro mi perché jero el più picoeo. Saltavo dentro el refetorio coi busaeoti da sinque litri ………………………
Dopo magnà, ‘ndavimo a rane. In fianco de l’aereoporto ghe jera ‘na canaeta, adesso xè Via Libia, cò dentro rane, tenche. Eori ‘ndava vanti a fato, coe braghe fate su, nea canaeta e i me butava su e rane co e man che mi ciapavo in freta e impiravo ne nà resta.
Quando che gavevo ea resta piena, no so, 200-250 rane spetavimo i ebrei che rivava a cavaeo e che ‘ndava dove che deso ghe zè il manejio de cavai e eà ghe jera ‘na pista coi ostacoi.
E tose jera vestie come principesse, anca i ebrei a cavaeo e i ne domandava se ghe vendevimo e rane. Figurate! I spetavimo aposta, e coi schèi ‘ndavimo al cinema, prima al Vitoria e dopo al Casaini. ‘ndavimo casa che jera e nove de sera, e zò bote. El Casaini jera in piassa del Carmine e in fianco ghe jera ea Pezzi Guttalin, dove lavorava me popà come magaziniere, che'l xè morto de tetano fulminante.
E ora: dopo l’oto Setembre ghe xè stà l’assalto ae caserme. I soldai jera scampà e tuti portava via tuto. Porte, finestre, e matonee dei bagni, i sanitari, tuto. Dopo nee caserme xè rivà i fasisti e noialtri continuavimo a portare via de tuto, coerte, nisoi. ‘na volta semo ‘ndà dentro na camerata e dentro nà camara, che ea jera de un tenente dei fasisti, ghe ghemo portà via el materaso de lana e gheo ghemo venduo a Madeo stramasaro.
Te capirè: i fasisti xè ‘ndà drio ea mura e i xè ‘ndà a domandarghe ae famèje chi che jera stà: “I tosi dee Cave”. Così i xè vegnù casa mia. Me mama jera tanto contenta che gavevimo coerte e nisoi e i né gà portà via tuto, visto che’a jera roba dell’esercito.